Izraeli tha se trupat e tij kanë nisur një operacion “të shënjestruar dhe preciz” tokësor në jug të Libanit, që ka në shënjestër Hezbollahun – grupin militant dhe partinë politike që kontrollon shumicën e jugut të Libanit – që mbështetet nga Irani.
Ushtria izraelite tha se në disa pjesë në jug të Libanit po zhvillohen “luftime intensive” dhe u bëri thirrje njerëzve që të mos hyjnë në zonën në jug të lumit Litani.
Në zonën në jug të lumit Litani janë dhjetëra qyteza dhe fshatra afër kufirit me Izraelin. Ndërkaq, ushtria e Libanit tha se ka ridislokuar trupa në disa pika vëzhguese përgjatë kufirit me Izraelin.
Ushtria libaneze nuk dha detaje se ku i ka vendosur trupat, por tha se po koordinohet me paqeruajtësit e Kombeve të Bashkuara, që janë të dislokuar përgjatë zonës kufitare. Po ashtu, ushtria libaneze të martën mohoi raportimet se trupat janë zhvendosur disa kilometra larg kufirit.
Izraeli nisi operacionin tokësor pavarësisht kundërshtimit të Shteteve të Bashkuara në mes të frikës se një veprim i tillë do të mund të nxjerrë jashtë kontrollit ngjarjet në Lindjen e Mesme.
Pavarësisht thirrjeve nga e mbarë bota për uljen e tensioneve, Izraeli është zotuar se do të mbajë presionin ndaj Hezbollahut dhe ka shpallur një zonë ushtarake në disa pjesë të kufirit të tij verior me Libanin.
Hezbollahu është e shpallur organizatë terroriste nga SHBA-ja, ndërkaq Bashkimi Evropian e ka futur në listë të zezë krahun e tij ushtarak, por jo edhe partinë politike. Partia politike e Hezbollahut ka ulëse në Parlamentin libanez.
“Në përputhje me vendimin e udhëheqjes politike, disa orë më parë Forcat e Mbrojtjes të Izraelit nisën bastisje të kufizuara, lokalizuara dhe shënjestruara tokësore bazuar në informacionet precize kundër caqeve terroriste të Hezbollahut dhe infrastrukturës në jug të Libanit”, tha ushtria izraelite në një deklaratë të publikuar në orët e vona të 30 shtatorit./REL
Burimi: botasot.info
