Sulmet ajrore izraelite goditën rreth 40 objektiva në të gjithë Rripin e Gazës dje, disa orë pasi Hamasi refuzoi ofertën e armëpushimit të Izraelit, duke thënë se ajo nuk plotësonte kërkesat e grupit për përfundimin e plotë të luftës.
Muajin e kaluar, ushtria izraelite theu një armëpushim dy mujor që kishte ndalur kryesisht luftimet në Gaza.
Që atëherë, ajo ka hyrë si nga veriu ashtu edhe nga jugu, duke kapur gati një të tretën e enklavës në një përpjekje për t’i bërë presion Hamasit që të pranojë të lirojë pengjet dhe të çarmatoset.
Ushtria izraelite tha se trupat po operonin në zonat Shabura dhe Tel Al-Sultan pranë qytetit jugor të Rafahut, si dhe në pjesën veriore të Gazës.
Raportohet se ndërmjetësuesit egjiptianë po përpiqen të ringjallin një marrëveshje armëpushimi të janarit, e cila u rrëzua kur Izraeli rifilloi sulmet ajrore dhe dërgoi trupat tokësore përsëri në Gaza.
Megjithatë, nuk ka ende asnjë shenjë se të dyja palët janë afruar në çështjet thelbësore.
Lexo po ashtuIzraeli godet me raketa tendat e refugjatëve në Gaza, të paktën 23 të vdekur
Dje vonë, Halil Al-Haja, udhëheqësi i Hamasit në Gaza, tha se lëvizja ishte e gatshme të shkëmbente të gjithë 59 pengjet e mbetura për palestinezët në burgjet në Izrael në këmbim të përfundimit të luftës dhe rindërtimit të Gazës.
Por ai e hodhi poshtë ofertën izraelite, e cila përfshin një kërkesë që Hamasi të heqë armët, duke e quajtur atë si “kusht të pamundur”.
Izraeli nuk i është përgjigjur zyrtarisht komenteve të Al-Haja-s, por ministrat kanë thënë vazhdimisht se Hamasi duhet të çarmatoset plotësisht dhe se nuk mund të luajë asnjë rol në qeverisjen e ardhshme të Gazës.
Ndryshe, një ofertë armëpushimi e bërë nga Izraeli përmes ndërmjetësve egjiptianë përfshin bisedime për një zgjidhje përfundimtare të luftës, por jo marrëveshje të fortë.
Ministri i Mbrojtjes Israel Katz tha gjithashtu këtë javë se trupat do të mbeten në një zonë tampon rreth kufirit që tani shtrihet thellë në Gaza dhe e ndan enklavën në dysh
Burimi: botasot.info
