Është vënë në pranga këtë të diel një 37-vjeçar, pasi mbante armë zjarri pistoletë dhe dyshohet se shiste lëndë narkotike, kokainë, në lokalin e tij.
Sipas raportimeve nga policia, në pranga ka rënë A. H., 37 vjeç, i cili në lagjen nr. 4 të Sarandës, gjatë kontrollit fizik, iu gjet dhe iu sekuestrua si provë materiale një armë zjarri pistoletë dhe një sasi kokaine.
“Si rezultat i kontrolleve të ushtruara nga shërbimet e Policisë në ambiente dhe subjekte të ndryshme në qytetin e Sarandës, bazuar edhe në informacionet e siguruara në rrugë operative, gjatë operacionit policor të koduar “Administratori”, u goditën një rast i armëmbajtjes pa leje dhe një rast i shitjes së lëndëve narkotike.
Për këto veprimtari kriminale u arrestua në flagrancë shtetasi A. H., 37 vjeç, banues në Sarandë.
Gjatë kontrollit në lokalin që administrohej nga ky shtetas, në lagjen nr. 4, Sarandë, si dhe gjatë kontrollit fizik ndaj tij, shërbimet e Policisë gjetën dhe sekuestruan, në cilësinë e provës materiale, 1 armë zjarri pistoletë me një krehër me 7 fishekë, si dhe një sasi lënde narkotike Kokainë, e cila dyshohet se posedohej me qëllim shitjen”, thuhet në njoftimine policisë.
Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Sarandë, për veprime të mëtejshme.
Burimi: botasot.info
