Efekti i tarifave të SHBA ndaj kompanive italiane do të jetë masiv – me modën, industrinë farmaceutike dhe atë ushqimore si sektorët më të prekur, tha të mërkurën kreu i lobit kombëtar të industrisë, Confindustria. Ai bëri thirrje që Europa të negociojë me presidentin amerikan Donald Trump për të shmangur një përshkallëzim të mëtejshëm dhe paralajmëroi se Kina do të përfitonte.
“Do të duhet të vlerësojmë me shumë kujdes [efektet] e tarifave që do të shpallen nga Trump. Ekziston një rrezik për Italinë, Qendra jonë e Kërkimeve po e kuanitifikon ndikimin, i cili do të jetë masiv”, tha Emanuele Orsini për gazetën La Stampa, siç shkruajnë Reuters e The Guardian.
Orsini tha se bizneset me eksporte më të larta – si sektori farmaceutik, industria e modës dhe ushqimore, si dhe makineritë e prodhimit – do të ishin ato më të prekura.
Ai gjithashtu paralajmëroi se nëse “Europa vazhdon ta ushqejë përplasjen e saj me SHBA-në, Kina do të përfitojë prej saj” dhe shprehu shpresën që Bashkimi Europian të mbetet i bashkuar në qasjen ndaj SHBA-së.
Orsini shtoi se shpreson që sipërmarrësit italianë të mos fillojnë ta konsiderojnë zhvendosjen e prodhimit jashtë vendit si pasojë e tarifave të reja.
Burimi: botasot.info
