Zëvendësministrja e Mbrojtjes Elfete Ismaili, ka marrë pjesë në Ditën e Mysafirëve të Lartë të stërvitjes shumëkombëshe “Seven Stars 25”, të organizuar nga Forcat Shumëkombëshe Paqëruajtëse e Evropës Juglindore (SEEBRIG). Stërvitja u zhvillua në Veles dhe në zonën stërvitore të Krivollakut.
Zëvendësministrja Elfete Ismaili ka informuar ae kjo stërvitje, e ndërtuar mbi parimet e operacioneve për mbështetjen e paqes, simuloi skenarë të ndërlikuar që përfshinin patrullimin e korridoreve logjistike, reagimin ndaj incidenteve të improvizuara dhe menaxhimin e situatave me përfshirje të popullatës civile.
“Njësitë tona të deklaruara, një kompani dhe një togë këmbësorike, u paraqitën me nivel të lartë gatishmërie, disipline dhe profesionalizmi, duke reflektuar përkushtimin e Forcave të Armatosura ndaj standardeve shumëkombëshe të bashkëpunimit ushtarak. Pjesëmarrja në këtë aktivitet dëshmon vendosmërinë e Republikës së Maqedonisë së Veriut për të kontribuar në sigurinë rajonale, përmes thellimit të bashkëpunimit me partnerët ndërkombëtarë. Ndërveprueshmëria, partneriteti dhe shkëmbimi i përvojave mbeten themel për ndërtimin e një ambienti të qëndrueshëm dhe të sigurt në rajon”, ka informuar Ismaili.
Burimi: lajme24.mk
