Irani u përjashtua nga Komisioni për Statusin e Grave (CSW) i OKB-së me arsyetimin për shkelje të të drejtave të grave, raporton Anadolu Agency (AA).
Këshilli Ekonomik dhe Social i OKB-së (ECOSOC) votoi një rezolutë të hartuar nga SHBA-ja për të “hequr me efekt të menjëhershëm” Iranin nga CSW për pjesën e mbetur të mandatit të tij 2022-2026.
Njëzet e nëntë shtete anëtare votuan pro rezolutës, tetë votuan kundër, duke përfshirë Rusinë dhe Kinën, ndërsa 16 abstenuan në Këshillin prej 54 anëtarësh.
Komisioni 45-anëtarësh i OKB-së për Statusin e Grave promovon barazinë gjinore dhe fuqizimin e grave.
Ambasadorja e SHBA-së në OKB, Linda Thomas-Greenfield, tha se rezoluta u përgjigjet thirrjeve të grave iraniane dhe shoqërisë civile.
Ambasadori i Iranit Amir Saeed Iravani e quajti largimin “hap të paligjshëm” dhe akuzoi SHBA-në se “po përpiqet të përdorë OKB-në për të çuar përpara agjendën e saj politike”.
Irani ka kryer dy ekzekutime gjatë protestave mbarëkombëtare që po vazhdojnë në vend, të cilat janë dënuar gjerësisht nga komuniteti ndërkombëtar dhe ekspertët e të drejtave.
Vendi është përfshirë nga protesta të gjera pas vdekjes së Mahsa Aminit në shtator gjersa ajo ishte në arrest policor për “veshje të papërshtatshme”.
Mijëra njerëz janë arrestuar, sipas grupeve të të drejtave të njeriut, ndërsa më shumë se 200 kanë vdekur.
Megjithatë, organizatat joqeveritare të huaja kanë theksuar se numri i viktimave është më shumë se 450, kurse SHBA-ja dhe BE-ja kanë vendosur një sërë sanksionesh ndaj zyrtarëve dhe subjekteve.
