Autoritetet iraniane konfirmuan blerjen e 4 avionëve Airbus nga Franca, transmeton Anadolu Agency (AA).
Sipas Agjencisë së Lajmeve të Studentëve Iranianë (ISNA), nënkryetari i Organizatës së Aviacionit Civil iranian, Hasan Hushu, konfirmoi importin e avionëve.
“Avionët e tipit Airbus 340 të prodhuar në Francë mbërritën së fundmi në vend”, tha Hushu.
Ndërkaq nuk janë dhënë detajet e importit.
– Sanksionet e SHBA-së ndaj Iranit
Pasi SHBA-ja njoftoi tërheqjen e saj të njëanshme nga Plani i Përbashkët Gjithëpërfshirës i Veprimit (COEP), i njohur si marrëveshja bërthamore me Iranin, më 8 maj 2018, Zyra e Mbrojtjes së Pasurive të Huaja (OFAC), e lidhur me Departamentin e Thesarit të SHBA-së, njoftoi rivendosjen e sanksioneve.
Sanksionet e SHBA-së që hynë në fuqi më 6 gusht 2018 mbulojnë edhe sektorin e aviacionit civil. Për shkak të sanksioneve, Irani nuk mund të importojë avionë pasagjerësh dhe pjesë avionësh.
Zëvendëskryetari i Bordit të Shoqatës së Kompanive Ajrore Iraniane, Ali Reza Berhor në dhjetor 2021 tha se më shumë se gjysma e avionëve nuk mund të fluturojnë sepse nuk mund të riparoheshin për shkak të sanksioneve.
Në Iran shpesh anulohen fluturimet për shkak të mosfunksionimit të avionëve dhe ka vonesa në fluturime.
