Kryetarja e Federatës së Sindikatës së Shëndetësisë së Kosovës, Tevide Imeri, ka deklaruar se profesionistët shëndetësore, siç janë mjekët dhe infermierët, gati e çdo ditë po largohen nga institucionet publike.
Imeri theksoi se ata që largohen nuk shkojnë të gjithë jashtë vendit, por sipas saj shkojnë edhe në spitalet private të cilat i kanë kushtet më të mira.
Ajo ka bërë të ditur se deri në muajin gusht, nga spitalet publike janë larguar rreth 200 punëtorë shëndetësorë, duke përfshirë pulmologë, anesteziologë, infermierë e të tjerë.
“Unë e di që janë mbi 200 për këtë gjysmë vit, por ka profesione të ndryshme dhe numri është i ndryshëm. Se fundi kanë ikur pulmologë, anesteziologë, kanë shkuar në spitale private”, ka deklaruar ajo në emisionin “Five”.
Imeri është shprehur se një numër i madh i studentëve krahas studimeve mjekësore, regjistrojnë edhe kurse të gjuhës gjermane, në mënyrë që pas studimeve të largohen nga vendi.
“Shumica infermierë dhe mjekë krahas studime po e ndjekin kursin e gjuhës gjermane, edhe ata që janë të padiplomuar kanë synim daljen jashtë vendit. Nuk kanë kushte të punës, nuk paguhen dinjitetshëm, nuk po trajtohen dinjitetshëm nga politika nga shteti”, ka deklaruaer Imeri.
Sipas Imerit, largimi i tyre është i arsyeshëm për shkak të kushteve jo të mira, por megjithatë ajo thekson se ky fakt është i dhimbshëm.
Në fund ajo ka thënë se shpreson se me ligjin e ri për paga, të rriten edhe pagat e punëtorëve shëndetësorë. Sipas saj deri më tani shteti i ka trajtuar në mënyrë të padinjitetshme mjekët e Kosovës.
