Instituti i Kërkimit Shkencor për Zhvillim të Qëndrueshëm (IKSZQ) në bashkëpunim me Universitetin “Haxhi Zeka” dhe universitetet partnere ndërkombëtare, mirëpriti Konferencën e parë Ndërkombëtare mbi zhvillimin rajonal të qëndrueshëm me temën “Tranzicioni Demografik në vitin 2050 dhe Politikat Rajonale”.
Kjo ngjarje e rëndësishme, e cila u mbajt në ambientet e Bibliotekës Kombëtare të Kosovës, tërhoqi vëmendjen e ekspertëve ndërkombëtarë, akademikëve dhe vendimmarrësve, të cilët u mblodhën për të diskutuar sfidat e mëdha që tranzicioni demografik do të sjellë në rajon dhe më gjerë.
Tranzicioni demografik, një fenomen që pritet të ndikojë ndjeshëm në strukturat ekonomike, sociale dhe mjedisore deri në vitin 2050, është fokus i shumë debateve globale, ndërsa politikat rajonale po përballen me nevojën për t’u përshtatur me ndryshimet që pritet të vijnë.
Kjo konferencë synon të krijojë një platformë për shkëmbimin e ideve dhe përvojave të reja, duke bashkëpunuar për të hartuar strategji që përballojnë këto sfida me zgjidhje të qëndrueshme.
Konferenca u hap me fjalime nga përfaqësues të universiteteve organizatore dhe ekspertë të fushës, të cilët vunë në dukje rëndësinë e bashkëpunimit ndërkombëtar në krijimin e politikave të qëndrueshme për të adresuar ndryshimet demografike që do të prekin rajonet në dekadat e ardhshme.
Diskutimet kryesore u përqendruan në ndikimin e këtyre ndryshimeve në zhvillimin ekonomik dhe shoqëror, si dhe në mjedisin natyror, me theks të veçantë në rolin e institucioneve akademike në nxitjen e hulumtimeve dhe inovacioneve për zgjidhjen e këtyre sfidave.
Nëpërmjet paneleve të shumta, të cilat përfshinin pjesëmarrës nga vende të ndryshme, u trajtuan tema të rëndësishme që lidhen me urbanizimin dhe migracionin, duke nxitur shkëmbimin e ideve dhe përvojave mbi politikat rajonale që mund të kontribuojnë në zhvillimin e qëndrueshëm.
Kjo konferencë vjen si pjesë e një nisme më të gjerë të Universitetit “Haxhi Zeka” për të kontribuar në zhvillimin rajonal, përmes hulumtimeve të avancuara dhe bashkëpunimeve ndërinstitucionale, duke krijuar ura të reja bashkëpunimi mes komunitetit akademik dhe institucioneve publike dhe private.
Pjesëmarrësit u shprehën optimistë për impaktin e diskutimeve që dolën nga kjo konferencë dhe u zotuan të vazhdojnë përpjekjet për të përfshirë perspektiva inovative dhe të qëndrueshme në politikat e ardhshme rajonale, duke kontribuar në një të ardhme më të mirë për komunitetet lokale dhe më gjerë, shkruan NJESHI.
Burimi: botasot.info
