Aktorja italiane Monica Vitti, e njohur më së shumti për rolet e saj në filmat e Michelangelo Antonioni, ka vdekur në moshën 90-vjeçare, tha të mërkurën ministria e kulturës, raporton France24.
“Lamtumirë Monica Vitti, lamtumirë mbretëreshë e kinemasë italiane. Sot është një ditë vërtet e trishtuar, ne kemi humbur një artiste të madhe dhe një italiane të madhe,” tha në një deklaratë Ministri i Kulturës Dario Franceschini.
Vitti fitoi famë ndërkombëtare me dramën e vitit 1960 “L’Avventura” (“Aventura”) në të cilën ajo luan një grua të torturuar që shoqërohet me të dashurin e shoqes së saj të humbur.
E lindur në Romë më 3 nëntor 1931, Vitti — emri i vërtetë Maria Luisa Ceciarelli — zbuloi pasionin e saj për teatrin gjatë Luftës së Dytë Botërore, kur argëtoi familjen e saj me kukulla për të lehtësuar mërzinë.
