Rritja e çmimeve të biletave të avionit në Evropë është “e pashmangshme” për shkak të rritjes së kostove të karburantit të avionëve, paralajmëroi drejtori i përgjithshëm i Shoqatës Ndërkombëtare të Transportit Ajror (IATA), Willie Walsh.
Walsh, në një intervistë për BBC, tha se kompanitë ajrore nuk mund t’i përballojnë në afat të gjatë kostot e rritura të karburantit, edhe pse disa kompani evropiane kohët e fundit kanë ulur çmimet e biletave për shkak të kërkesës më të dobët.
Ai paralajmëroi edhe për rreziqet në furnizim në prag të sezonit të verës, duke theksuar se aviacioni britanik mund të përballet me presion të mundshëm mbi rezervat e karburantit gjatë kulmit të sezonit, megjithëse, siç tha ai, “nuk ka arsye për panik”.
Sipas tij, edhe në rast të hapjes së shpejtë të Ngushticës së Hormuzit, ndërprerjet në tregun e naftës dhe dëmtimet e rafinerive në Lindjen e Mesme mund të kenë efekt afatgjatë në çmimet e karburantit.
“Thjesht nuk ka mënyrë që kompanitë ajrore t’i përballojnë kostot shtesë,” tha Walsh, duke shtuar se çdo ulje çmimesh do të ishte afatshkurtër dhe se kostot në fund do të reflektohen te pasagjerët.
Ai paralajmëroi se problemi mund të zgjasë disa muaj, madje edhe deri vitin e ardhshëm.
Bashkimi Evropian deklaroi se nuk sheh pengesa rregullatore për përdorimin e karburantit ajror amerikan, me kusht që importi i tij të menaxhohet me kujdes, ndërsa komisioneri për energji Dan Jørgensen tha se nuk pret mungesa në afat të shkurtër, por se rreziqe afatgjata ekzistojnë.
Nga industria turistike vijnë vlerësime të ngjashme – drejtori i kompanisë TUI, Sebastian Ebel, tha se nuk pret ndërprerje serioze në muajt e ardhshëm.
Qeveria britanike tha se po e ndjek situatën dhe po bashkëpunon me kompanitë ajrore për të shmangur ndërprerjet dhe për të mundësuar planifikim stabil të fluturimeve gjatë sezonit të verës.
Burimi: lajmpress.org
