Një operacion i zhvilluar nga Seksioni për Hetimin e Krimit Ekonomik e Financiar në Tiranë ka çuar në pranga një 31-vjeçar të identifikuar si Olti.F, 31 vjeç.
“Nga veprimet hetimore ka rezultuar se shtetasi Olti. F., nëpërmjet një call center-i të paregjistruar në organet tatimore, u prezantohej shtetasve të huaj si agjent burse që investonte në Kriptomonedha dhe Forex. Nëpërmjet këtij mashtrimi, ky shtetas ka përvetësuar nga një klient i huaj, shumën prej 108000 euro,” informon policia.
Arrestimi i tij u bë për veprat penale “Mashtrimi”, “Fshehja e të ardhurave”, “Mospagimi i taksave dhe tatimeve” dhe “Punësimi i paligjshëm”.
Gjithashtu u bë procedimi penal për 3 shtetas të tjerë.
Vijon puna për dokumentimin e plotë të kësaj veprimtarie të kundërligjshme dhe identifikimin e personave të tjerë të përfshirë në të.
Materialet i kaluan Prokurorisë së Rrethit Gjyqësor Tiranë, për veprime të mëtejshme procedurale.
