Pas përplasjes së një fëmije 5-vjeçar mbrëmjen e djeshme, rreth orës 22:30, mund të fshihet një histori inatesh dhe xhelozie. Fëmija u përplas nga një makinë në kryqëzimin e rrugëve Pinelli dhe Industria, në lagjen San Donato, dhe u dërgua në gjendje të rëndë në spitalin Regina Margherita.
I vogli ishte me babain, nënën dhe motrën e tij kur, në kryqëzim, një Fiat Panda e verdhë humbi kontrollin dhe u përplas me ta. Fëmija u përplas në asfalt, ndërsa makina goditi një automjet të parkuar. Gruaja që ishte në timon u largua nga vendi i ngjarjes.
Por ajo që në fillim dukej si një aksident i rastësishëm, shumë shpejt mori një tjetër drejtim. Ishte babai ai që e njohu personin që drejtonte makinën: “Ish-e dashura ime, ishte ajo, na përplasi qëllimisht”, bërtiti ai. Sipas kësaj hipoteze, objektivi i vërtetë i drejtueses së automjetit mund të ketë qenë pikërisht ai.
Gruaja, Camilla D’Alessandra, 24 vjeçe, nga Torino, u gjet nga karabinierët e njësisë së ndërhyrjes së shpejtë të Torinos dhe u arrestua nën akuzën për tentativë vrasjeje dhe plagosje të rëndë.
Fëmija qëndroi gjatë gjithë kohës i vetëdijshëm. Ai mori ndihmën e parë nga ekipet mjekësore të ambulancës 118 dhe më pas u transportua me kod të kuq në spitalin pediatrik, ku iu konstatua një traumë në kraharor dhe në abdomen. Mjekët vlerësuan se dëmtimet do të kërkojnë rreth 40 ditë për t’u shëruar.
Menjëherë, komuniteti maroken, pjesë e të cilit është familja e fëmijës, u mblodh në vendin e aksidentit dhe nisi kërkimi për gruan që e kishte përplasur. Në vendngjarje mbërritën patrullat e policisë bashkiake dhe karabinierët, të cilët nisën hetimet për të rindërtuar me saktësi atë që kishte ndodhur.
Karabinierët po punojnë për të përcaktuar dinamikën e ngjarjes. Ndërkohë, avokati i të resë së ndaluar, Cristian Scaramozzino, deklaroi: Fakti që vajza dhe babai i fëmijës njiheshin me njëri-tjetrin nuk e përjashton automatikisht mundësinë e një aksidenti. Hipotezën e aksidentit do ta mbaja ende në konsideratë, pavarësisht veçantisë së faktit që personat njiheshin.
Burimi: botasot.info
