Opozitarja VMRO-DPMNE, e në veçanti kreu i saj Hristijan Mickoski me fjalimin e sontëm në një takim partiak në Kërçovë, ka lënë të kuptohet se halli i tij më i madh është fuqia politike dhe ekzekutive e Bashkimit Demokratik për Integrim (BDI) dhe Ali Ahmeti, e jo ndryshimet kushtetuese, apo siç parapëlqen të thotë ai “diktati” bullgar.
Ai ka deklaruar hapur se e lufton BDI-në, apo siç është shprehur, “Qeverinë e BDI-së”.
“Nuk ishte e lehtë, mos mendoni se ishte e lehtë. Ne nuk luftojmë vetëm kundër kësaj qeverie të BDI-së të mbështetur nga partneri i koalicionit të vogël, LSDM-së. Partneri më i vogël. Ata janë hyzmeqarët e vegjël të BDI-së, hyzmeqarët e vegjël të këqij që i shërbejnë Ali Ahmetit”, tha Mickoski.
Me këtë deklaratë të Mickoskit sheshazi shihet se puna e palodhshme e ministrave të BDI-së të kryesuar nga zëvendëskryeministri i parë Artan Grubi, por edhe mbështetja e plebishitare e shqiptarëve për BDI-në dhe Ali Ahmetin, janë “halë në sy” për Hristijan Mickoskin.
Me këtë tregon se halli i tij nuk është nëse bullgarët do të futen në Preambulën e Kushtetutës së Maqedonisë së Veriut, por dobësimi i fuqisë politike dhe ekzekutive të BDI-së. Andaj edhe bashkëpunimi i tij me disa “satelitë” shqipfolës tregon për ëndrrën në të cilën bie e zgjohet nga gjumi Mickoski, e ajo është ta sheh BDI-në e “dobët”.(Indeks.mk)
