Parlamenti i Australisë së shpejti do të debatojë për rritjen e gjobave për firmat që nuk arrijnë të mbrohen nga vjedhja e të dhënave të klientëve të tyre, tha të shtunën Prokurori i Përgjithshëm Mark Dreyfus, pas një serie sulmesh hakerimi në javët e fundit që kanë prekur miliona qytetarë.
Sektori i telekomunikacionit, financiar dhe publik i Australisë është në gatishmëri të lartë pasi Optus, kompania e dytë më e madhe e telekomunikacionit në vend, zbuloi më 22 shtator se një sulm hakerimi kishte vjedhur informacionin personal të rreth 10 milionë abonentëve.
Këtë muaj, i njëjti rast u regjistrua nga kompania Medibank Private, e cila ofron shërbime të sigurimit shëndetësor për çdo të gjashtë Australian, pasi hakerët morën informacione për 100 të siguruar, përfshirë informacione nga të dhënat shëndetësore. Dreyfus njoftoi se javën e ardhshme qeveria do të dërgojë amendamente që do të rrisin ndjeshëm gjobat në rast të shkeljes së përsëritur të sistemit dhe vjedhjes së të dhënave personale.
Në vend të pak më shumë se dy milionë dollarë australianë (rreth 1.4 milionë dollarë), gjoba maksimale së shpejti do të jetë 50 milionë dollarë australianë. Qytetarët që u kanë besuar kompanive të dhënat e tyre personale presin që të njëjtat të dhëna të mbeten të mbrojtura, pohon kryeprokurori i shtetit.
“Rastet e regjistruara të shkeljeve të privatësisë së qytetarëve në javët e fundit kanë treguar se mekanizmat aktualë të mbrojtjes nuk janë më të kënaqshëm. Nuk mjafton ta shohësh gjobën në si një nga kostot e të bërit biznes. Ne kemi nevojë për ligje më cilësore që do të kujdesen sesi kompanitë menaxhojnë një sasi të madhe të të dhënave të qytetarëve”, tha Dreyfus.
Në fillim të këtij muaji, pas shkeljes së Optus, qeveria zbuloi planet për të riparuar rregullat e privatësisë së konsumatorëve, të cilat do të ndihmonin në lehtësimin e ndarjes së të dhënave midis telekomit dhe bankave. Pas sulmit në Optus, dy rregullatorë kombëtarë hapën një hetim, i cili ishte shënjestër i kritikave të ashpra sepse nuk parandaloi hakimin, një nga më të mëdhenjtë e regjistruar në Australi. /tesheshi.com/
Burimi: GAZETA.MK
