Grupi i deputetëve demokrat nën drejtimin e Sali Berishës dhe Gazment Bardhit kanë njoftuar mbledhjen e radhës të përbashkët, që do të mbahet më datë 19 shtator në Kukës.
Kjo është mbledhja e tretë e përbashkët e deputetëve demokratë që pas ndryshimeve në statutin e PD që i mori kompetencat e kreut të grupit parlamentar të PD, Gazment Bardhit.
Në mbledhjen e fundit Gazment Bardhi tha se qëllimi i deputetëve të opozitës është të rakordojnë agjendën në aksionin e tyre anti-qeveri. Ai renditi një sërë çështjesh që u diskutuan si dhe vendime që u morën.
“Kemi marrë disa vendime të rëndësishme që kanë të bëjnë me çështje në interes të qytetarëve, së pari grupi parlamentar i Partisë Demokratike dhe Aleancës për Ndryshim kanë vendosur të propozojnë një paketë ligjore dhe kanë ngarkuar ekspertët e grupit për të nisur menjëherë punën për sa i përket rritjes së pensioneve, masës së ndihmës ekonomike dhe skemës së pagesës për personat me aftësi të kufizuara duke përfshirë edhe çuarjen përpara të projektligjit për përcaktimin e minimumit jetik. Ky ishte vendimi i parë që u diskutua sot, ndërsa sa i takon llogaridhënies së qeverisë kanë ndërtuar një agjendë të plotë të komisioneve parlamentare ku do të ketë seanca dëgjimore në këto komisione për çështje në interes të publikut, dua të sjell në vëmendje një seancë dëgjimore sa i përket abuzimeve me fondet e Bashkimit Europian për bujqësinë, pra parlamenti do të duhet të njihet me raportin e zyrës anti-korrupsion të Bashkimit Europian që i është dorëzuar qeverisë shqiptare dhe më pas ministria e Bujqësisë do të duhet të raportojë në komisionin përkatës parlamentar”, – u shpreh Bardhi.
