Komuna e Gostivarit ka shënuar sot ditën e saj, 23 Dhjetorin. Ceremonia filloi me një video-përshkrim të investimeve të realizuara, gjatë vitit 2022, të cilat janë, siç u tha, shumë në numër edhe pse ky ishte një vit i krizës energjetike. Më pastaj, u ndanë mirënjohjet dhe titulli “Qytetar nderi”.
Të pranishmëve u dëshiroi mirëseardhje kryetari Arben Taravari, i cili me këtë rast ka falënderuar bashkëpunëtorët dhe çdo qytetar të gostivarit për kontributin e dhënë.
“Këtë vit qytetar nderi i Gostivarit u shpall Enver Zenku, kryetari i parë i komunës së Gostivarit pas pluralizmit. Titulli ”Qytetar Nderi”, është titulli më i lartë që u jepet personaliteteve të larta politike, shoqërore, shkencëtarëve, artistëve, sportistëve, të huajve etj., në shenjë respekti, miqësie apo mirënjohjeje për kontribute të rëndësishme e të veçanta në fusha të ndryshme në të mirën e qytetarëve.”, – deklaroi kryetari i Gostivarit, Arben Taravari.
Ndërsa, me mirënjohje u dekoruan personalitete të ndryshme gostivarase për arritje vendore dhe ndërkombëtare: Dr. Prof. Fadil Hoxhai, i cili në vitin 2013 është zgjedhur akademik i vitit në Maqedoninë e Veriut nga ana e Ministrisë së Arsimit, pastaj kampioni i botës, balerini Andi Ismaili; hendbollisti Daniell Gjorgjeski për arritje në sport; Liza Abdija në aktrim dhe Metin Memed, i cili është autor i librit “Botëra të veçanta” ku trajton jetën e personave me aftësi të veçanta.
