Një gjykatë federale në Shtetet e Bashkuara tha se Google mban një monopol në reklamimin online. New York Times raportoi ditën e Enjte se gjykatësja Leonie Brinkema e Distriktit të Virxhinias tha se kompania ka shkelur ligjin për të mbajtur dominimin e saj në reklamat dixhitale.
“Jo vetëm që ka privuar rivalët nga mundësia për të konkurruar, por sjellja përjashtuese e Google ka goditur konsumatorët, proceset konkurruese dhe si rezultat privuar konsumatorët nga një internet dhe informacion i hapur,” tha gjykatësja.
Çështja buronte nga një padi e Departamentit Amerikan të Drejtësisë dhe 8 shteteve Amerikane. Ata akuzonin Google se ka monopolizuar në mënyrë të paligjshme tregun e reklameve online dhe përdorur këtë fuqi për të fituar më shumë terren në këtë industri.
Qeveria Amerikane thotë se Google ka 87 përqind të tregut të reklameve online. Gjykata gjithashtu rrëzoi gjysmën e padisë së qeverisë Amerikane duke thënë se mjetet si DoubleClick nuk dëmtojnë konkurrencën.
Padia thoshte se monopoli i Google detyron publikuesit të përdorin softuerin e saj të reklamave duke mos ju lënë organizatave mediatike dhe uebsajteve të tjera më shumë hapësirë. Sipas qeverisë Amerikane një gjë e tillë ka reduktuar të ardhurat e uebsajteve të lajmeve, veçanërisht atyre me abonime.
Vendimi më i fundit i gjykatëses Brinkema vjen pas një tjetër vendimi në Gusht ku tha se Google ka monopolizuar kërkimin online. Asokohe gjykatësi Amit Mehta kërkoi shpërbërjen e Google ndërsa Brinkema tashmë përballet me një tjetër vendim të vështirë përballë një kompanie 1.9 trilionë dollarëshe. /PCWorld Albanian
Burimi: pcworld.al
