Gjykata Evropiane e Drejtësisë vendosi sot se Spanja lejoi nivelet e ndotjes së dyoksidit të azotit (NO2) të tejkalojnë sistematikisht standardet e BE-së në Madrid dhe Barcelonë midis 2010 dhe 2018.
Gjykata deklaroi se nivelet e dëmshme të NO2 i kaluan kufijtë në zonat ku jetojnë 7.3 milionë njerëz, pra në dy qytetet më të mëdha spanjolle dhe një zonë industriale pranë Barcelonës.
“Që nga viti 2010, Spanja nuk ka miratuar masa që do të siguronin që niveli i ndotjes të mos i kalojë standardet evropiane ose të reduktohet në kohën më të shkurtër të mundshme”, thuhet në vendim.
Nuk është bërë e ditur se çfarë lloj dënimi mund të shqiptohet.
Kreu i departamentit të mbrojtjes së mjedisit të Barcelonës, Janet Sanz, tha se qyteti është i fokusuar në përmirësimin e transportit publik, çiklizmit dhe masave të tjera kundër ndotjes dhe i takon administratës qendrore dhe rajonale të bëjnë pjesën e tyre.
“Ne kemi qenë në rrugën e duhur për tre vjet, por ne nuk do të ndalemi këtu,” tha ajo.
Agjencia kujton se në Madrid kjo temë është në qendër të konflikteve politike, ku kryebashkiaku José Martínez-Almeida akuzon administratën e mëparshme të qytetit se nuk po merret me ndotjen e ajrit, ndërsa opozita fajëson kryebashkiakun për anulimin e disa masave kundër ndotjes.
Burimi: GAZETA.MK
