Gjermania ka testuar sistemin e saj të alarmit mbarëkombëtar për situata krizash dhe fatkeqësish, transmeton Anadolu.
Të gjithë telefonat celularë në të gjithë Gjermaninë morën një alarm emergjence në orën 10:59 të mëngjesit me orën lokale, me një tingull të lartë si sirena. Alarmi u transmetua edhe në tabelat e reklamave, radiot dhe stacionet televizive.
“Sipas vlerësimit tonë të parë, sistemet tona të paralajmërimit mbarëkombëtar kanë kaluar testin e madh të stresit”, tha ministrja gjermane e Punëve të Brendshme, Nancy Faeser.
Siç tha ajo, një paralajmërim në kohë mund të shpëtojë jetë, pavarësisht nëse ka zjarre, stuhi të forta apo rreziqe të tjera.
“Ne duam të sigurohemi që qytetarët të mund të mbrojnë veten dhe të tjerët në mënyrën më të mirë të mundshme dhe të njohin rreziqet në kohën e duhur”, theksoi ajo.
“Dita e alarmit mbarëkombëtar” në Gjermani mbahet çdo vit në shtator, me qëllim për të rritur ndërgjegjësimin e publikut për masat e mbrojtjes civile, për të testuar sistemin e paralajmërimit mbarëkombëtar dhe për të informuar njerëzit se si do të duken alarmet e ardhshme.
