Ministri gjerman i Drejtësisë Marco Buschmann tha se dënimet me burg janë të mundshme kundër aktivistëve të klimës që bllokojnë rrugët dhe dëmtojnë artin.
“Kushdo që hedh lëng ose sende mbi veprat e artit mund të përgjigjet penalisht nëse vepra arti dëmtohet. Bllokimi i rrugëve mund të karakterizohet si detyrim. Dhe nëse për këtë pengohet ardhja e një ambulance, është e mundur edhe akuza për shkaktim të lëndimit trupor nga pakujdesia”, tha ministri i Drejtësisë Marco Buschmann (Partia Liberal-Demokratike FDP).
Ai tha se ligji përveç gjobave parashikon edhe dënime me burg për këto lloj krimesh.
“Këto ligje duhet të zbatohen,” tha Buschmann.
Javët e fundit, aktivistët mjedisorë të grupit Last Generation kanë shkaktuar reagime të ndara nga publiku me veprime spektakolare, si hedhja e bojës mbi veprat e artit në muze apo bllokimi i rrugëve.
Gjatë bllokadës së fundit të një rruge të Berlinit, mjetet e emergjencës mbërritën me vonesë të madhe në vendin e një aksidenti trafiku ku një çiklist mbeti i plagosur rëndë.
Përfaqësuesit e protestuesve mohuan përgjegjësinë për incidentin, duke pretenduar se automjetet e urgjencës u ngadalësuan sepse përdoruesit e rrugës nuk krijuan një vendkalim mesatar në rrugë për policinë dhe automjetet e urgjencës, siç kërkohet nga rregullat e trafikut në rast bllokimi trafiku në autostradë.
Renate Kuenast, një politikane nga Partia e Gjelbër në pushtet, tha se kjo formë proteste çon në një rrugë pa krye.
“Mendoj se nuk ka kuptim kur më shumë diskutohet forma e protestës dhe çështja e legjitimitetit të kësaj lloj proteste sesa vetë përmbajtja. Ajo të çon në një rrugë pa krye”, tha Kuenast.
Kryetarja e bashkisë së Berlinit, Franziska Giffay, kritikoi këto forma proteste, duke vlerësuar se ato kërcënojnë sigurinë publike të qytetarëve.
Edhe kancelari gjerman Olaf Scholz së fundmi deklaroi se nuk i miraton këto forma proteste.
Anëtarët e lëvizjes “Brezi i fundit” thanë se me veprimet e tyre duan të përshpejtojnë vendimmarrjen që do të çonte në ngadalësimin e ndryshimeve klimatike.
