Tre ndeshje në stolin e Skënderbeut, tre barazime për Skënder Gegën. Trajneri i ekipit korçar foli për “Gol pas Goli” në Supersport rreth barazimit 0-0 në Durrës, VAR-it dhe objektivit mbijetesë, me korçarët që mbajnë vendin e fundit me 20 pikë.
“Sot na mungoi fitorja. Erdhëm për të marrë maksimumin, por edhe Teuta, pavarësisht ulje-ngritjeve, është ekip kampion. Pjesa e parë nuk ishte e mirë, toleruam në mesin e fushës. Do mundohemi të korrigjohemi.
Mungesat e Zguros dhe Berishës, skuadra e padisiplinuar? Presioni bën të vetën, edhe pse mundohem t’i qetësoj. Berisha pretendon që nuk ishte ai aktori i asaj që ndodhi.
Sondazhet thonë që njerëzit janë të bindur që Skënderbeu do rrëzohet nga kategoria? Shumë sondazhe nuk funksionojnë, si në gjithë botën. Më vjen që nuk funksionuam ndaj Kukësit, mund të merrnim maksimumin. Sot nuk e filluam mirë, gjendja e disa lojtarëve është e rënduar, nuk kanë pushuar.
Në pjesën e dytë bëmë maksimumin për të marrë më të mirën. Ne jemi në Shqipëri, por është normale që të bëhet progres Shqipëri. Është bërë progres, por gjyqtarët gabojnë, edhe ne gabojmë.
Në Korçë dëshiroja që gjyqtari ta shihte në VAR pretendimin tonë për penallti, kaq. VAR-i nuk bëhet me australianë, edhe ata të VAR-it duhet të jenë më të kujdesshëm.
Skënderbeu? Është një grup i brishtë, me lojtar të rinj. U jap besim lojtarëve, në stërvitje lojtarët kanë shfaqur atë që dua, por në ndeshje është ndryshe. Do të dalim dinjitozë nga ky kampionat, është një sport ku i jepet dora më të fortit”, deklaroi Gega.
