Gazetarja Alba Kepi ka komentuar vizitën e kryeministres italiane Georgia Meloni në vendin tonë dy ditë më parë.
Në një lidhje të drejtpërdrejtë për Euronews Albania, ajo theksoi se në takimin e Melonit me homologun e saj shqiptar Edi Rama, u diskutua dhe për ndërtimin e një centrali bërthamor në vendin tonë.
Sipas saj kjo lëvizje vjen pasi Italia ka nevojë për furnizim energjie.
“Nuk ishte vetëm një ftesë që Rama i bëri Melonit por ishte dhe një agjendë pune e cila nis jo vetëm për atë që ka nevojë Italia, për të garantuar një siguri furnizimi energjetik, gjatë muajve të ardhshëm. Italia kërkon të mbyllë boshllëkun e krijuar për shkak të vendosjes së sanksioneve të Rusisë. Italia kërkon të mbyllë këtë boshllëk me krijimin e një centrali bërthamor. Nuk është një ide surprizë, por duket si një nevojë që Meloni ka. Shqipëria është një vend afër Italisë dhe vendi ku mund të krijojë një central bërthamor pa pasur atë lloj tensioni politik dhe mediatik nga ana e qytetarëve Italianë dhe me faktin që mund të bëjë një investim të madh në një vend si Shqipëria”- tha ajo.
