Të gjithë në Bergamo e jo vetëm i kanë sytë nga Atalanta e tij dhe Gasperini e di fare mirë se pas kapjes së kryesimit në Serinë A, presioni është edhe më i madh para Realit të Madridit. Ai e di gjithashtu se edhe skuadra e tij ka ndryshuar nga ajo që u mund nga Reali në gusht të këtij viti në finalen e Superkupës së Europës.
Por trajneri i “Dea”-s është munduar të shmangë euforinë që mbizotëron në qytet para vizitës së Realit të Madridit.
“Ne jemi gati, jemi në një ecuri shumë të mirë, teksa vijmë pas 9 fitoresh radhazi.
Por kjo nuk do të thotë se do të fitojmë automatikisht. Kemi fituar këto ndeshje duke qenë modestë e kokulur. kemi punuar fort për të mbërritur deri këtu.
Dhe duam të vijojmë me ecurinë tonë. Por natyrisht duhet të qëndrojmë me këmbë në tokë dhe të vlerësojmë kundërshtarin që kemi përballë. Po flasim për Realin e Madridit dhe sa përmend këtë emër fjalët janë të pakta. Ne do të bëjmë gjithçka për t’i dhënë gëzim qytetit, tifozëve tanë. Por duhet të bëjmë kujdes e të mos rrëshqasim”, tha ai.
Burimi: botasot.info
