Në kuadër të Ditës Botërore të Ndërgjegjësimit për Autizmin, më 2 prill, Kryetari i Kuvendit, Afrim Gashi, priti në kabinetin e tij një grup fëmijësh, prindërish, mësimdhënësish dhe përfaqësuesish të shoqatave të ndryshme. Gjatë këtij takimi, ai theksoi rëndësinë e ngjarjeve të tilla në ndërtimin e një shoqërie të barabartë dhe të pranueshme për të gjithë individët, pa marrë parasysh dallimet e tyre.
Kryetari Gashi u shpreh se takime të tilla inkurajojnë dëgjimin dhe mësimin, duke theksuar se janë një mundësi e shkëlqyer për të promovuar pranimin dhe respektimin e diversiteteve. Ai shtoi se secili fëmijë pjesëmarrës në këtë ngjarje na e kujton se çdo individ, pavarësisht dallimeve, ka një botë të tij unike, me potencial të pafund dhe një shpirt që meriton mundësinë për të arritur më të mirën.
“Ky moment, përveç rëndësisë së tij simbolike, është gjithashtu një mundësi për të ndërtuar një shoqëri më të ndjeshme dhe më të bashkuar. Ata që na kujtojnë se bukuria e jetës qëndron në pasurinë e diversiteteve janë ata që na e bëjnë më të pasur këtë botë,” theksoi Kryetari Gashi.
Ai i dëgjoi me vëmendje shqetësimet dhe sfidat e prindërve dhe mësimdhënësve, duke premtuar se brenda mundësive të tij, do të ndërmarrë të gjitha hapat e nevojshëm për përmirësimin e kushteve dhe ngritjen e standardeve të jetesës për personat me autizëm. Po ashtu, Gashi theksoi se Kuvendi, me angazhim dhe respekt, mbetet i hapur për të dëgjuar dhe kuptuar më mirë nevojat dhe potencialin e këtyre individëve.
Burimi: lajme24.mk
