1
Ohër, 20 prill – Fundjava e zgjatur për Pashkë dhe moti i mirë i mbushën Ohri dhe Strugën. As çmimet e larta në restorante dhe kafene nuk i zmbrapsën turistët, ndërsa gastronomët këto ditë po i fërkojnë duart. Më të shumtët janë mysafirët nga vendi si dhe Serbia, Mali i Zi, Bullgaria dhe Shqipëria. Por ka edhe grupe të organizuara dhe turistë individualë nga shtetet evropiane dhe nga Lindja e Largët.
“Më kureshtarët janë turistët evropianë, veçanërisht ata që vijnë nga vendet skandinave, sepse ata tashmë kanë lexuar për historinë, e dinë se ku ndodhen dhe Ohri është shumë interesant dhe atraktiv, sidomos pjesa e vjetër e qytetit. Askush nuk ka ikur nga këtu pa përshtypje të mira”, tha Tanja Skeparoska – punonjëse turistike.
Akomodimi privat është në masë të madhe i mbushur, ndërsa kapacitetet hotelierike nga 50 deri në 70 për qind. Megjithatë, sektori turistik është në pasiguri se çfarë sezoni i pret, për shkak të anulimeve të paralajmëruara nga disa prej operatorëve turistikë evropianë.
“Shohim që Ohri është mirë i mbushur, që ka vazhdimisht ardhje të turistëve të huaj, megjithatë nuk e dimë çfarë do të ndodhë me sezonin, përkatësisht me ata turistë të huaj që vinin të organizuar me fluturime çarter, prej shumë vitesh. A do të kenë ndonjë ndikim këto anulime apo jo, a do të jenë shifrat si vitet e kaluara apo të ngjashme, ende nuk mund të themi, sepse kemi paralajmërime për anulime”, u shpreh Jakin Malenko – pronar i agjencisë turistike.
Ohri dhe Struga pritet të jenë të mbushura në mënyrë të kënaqshme edhe për festat e ardhshme të 1 Majit.
BURIMI: zhurnal.mk
