Amir Rrahmani është shprehur i kënaqur pasi Napoli siguroi kualifikimin për në Ligën e Kampionëve.
Reprezentuesi i Kosovës tha se më pak mund të ishin ende në garë për titullin e kampionit, por që këtë sezon e vlerësoi si pozitiv.
“Me pak më shumë fat, ndoshta mund të kishim luftuar për Scudetton. Por, ishte një kampionat pozitiv, sepse u kualifikuam në Ligën e Kampionëve”, tha fillimisht Rrahmani.
28-vjeçari tutje foli edhe për Lorenzo Insigne, i cili u përshëndet me tifozët në ndeshjen e fundit të Napolit në shtëpi.
“Nga njëra anë ishte e këndshme të shihje stadiumin plot, por nga ana tjetër ishte e trishtuar, sepse Lorenzo po largohet. Do të na mungojë, sepse një lloj lojtari si ai i shërben gjithmonë ekipit, veçanërisht nëse flasim për një kapiten”, tha Rrahmani.
Vlen të theksohet se Amir Rrahmani këtë sezon ishte i pa zëvendësueshëm te Napoli dhe një prej lojtarëve kyç të skuadrës.
Pas 37 xhirove në Serie A, napolitanët ndodhen në pozitën e tretë me 76 pikë.
Kjo pozitë nuk do të ndryshojë për këtë skuadër as pas xhiros së 38 dhe të fundit në elitën e futbollit italian.
