Numri i të vdekurve nga shirat e dendur dhe përmbytjet në Filipine është rritur në 13, ndërsa 23 të tjerë janë të zhdukur, thanë autoritetet, transmeton Anadolu Agency (AA).
Vendi i Azisë Juglindore u godit nga reshje të dendura të shiut gjatë fundjavës, të cila prishën festimet e Krishtlindjeve.
Këshilli Kombëtar për Reduktimin dhe Menaxhimin e Rrezikut të Fatkeqësive i vendit tha në një deklaratë se përmbytjet kanë lënë 13 të vdekur, ndërsa 23 janë të zhdukur, pasi shirat e dendur goditën të paktën gjashtë rajone të vendit arkipelag me 18 provinca.
Ndërkohë, gjashtë persona të tjerë kanë pësuar lëndime.
Shira të dendur u regjistruan në provincat Camarines Sur dhe Misamis Occidental, si dhe në rajonet Visayas Lindore, Bicol dhe Mindanao Veriore.
Agjencia filipinase e motit PAGASA tha se erërat e ftohta dhe të ngrohta do të vazhdojnë të sjellin shira në Visayas, Caraga, Mindanao Veriore, Gadishullin Zamboanga, Basilan, Sulu, Tawi-Tawi dhe Palawan, të cilat “mund të shkaktojnë përmbytje dhe rrëshqitje dheu”.
Sipas agjencisë së fatkeqësive, përmbytjet kanë prekur mbi 44.282 familje, duke përfshirë më shumë se 166.357 individë.
Rreth 45.382 njerëz janë zhvendosur për shkak të shirave dhe përmbytjeve dhe tani po qëndrojnë në 87 qendra evakuimi, njoftohet më tej.
