Zëvendëskryeministri Arben Fetai ka reaguar ashpër ndaj deklaratave të përfaqësuesve të BDI-së, duke i cilësuar ato si “perversitet politik”. Ai ka kritikuar BDI-në për tentativat e saj për të mbajtur ligjërata mbi drejtësinë dhe llogaridhënien, pavarësisht se në radhët e kësaj partie, sipas tij, ka qindra individë të përfshirë në afera korruptive dhe tragjedi të ndryshme.
“Është një perversitet që vetëm BDI mund ta bëjë, të dalë e të na mbajë ligjërata për drejtësinë dhe llogaridhënien, ndërkohë që brenda partisë së tyre ka dhjetëra e qindra njerëz të përfshirë në afera korruptive dhe tragjedi të diskutuara publikisht. Shohim se si janë tërhequr pasi kryeministri tha se do t’i nxjerrë për veshi dhe se janë shukatur”, ka deklaruar Fetai.
Në mënyrë të veçantë, ai u ndal te rasti i ish-ministrit të Ekonomisë, Kreshnik Bekteshi, i cili është arrestuar në lidhje me tragjedinë e Koçanit. Fetai ka vënë në pah faktin se Bekteshi po mbrohet nga avokatë të lidhur me figurat e njohura të pushtetit të mëparshëm, duke ngritur dyshime mbi kredibilitetin e mbrojtjes së tij. “Është për keqardhje të shohësh se si Kreshnik Bekteshi mbrohet nga avokatët e Mijallkovit dhe Llatasit, ndërsa na flasin për drejtësi dhe për shqiptarët. Ata as ekipin e mbrojtjes nuk e kanë shqiptar, e lëre më të jenë të njohur për ndonjë kontribut në zbardhjen e rasteve të montuara”, ka theksuar zëvendëskryeministri.
Burimi: alfax.mk
