Parlamenti Evropian ka konfirmuar se procesi i anëtarësimit të Turqisë në Bashkimin Evropian mbetet i ngrirë, duke përmendur si arsye kryesore mungesën e përparimit demokratik dhe shkeljet e të drejtave të njeriut.
Pavarësisht rëndësisë strategjike të Turqisë si një partner kyç në NATO dhe në bashkëpunimin për çështjen e migracionit, eurodeputetët nuk shohin mundësi për rifillimin e negociatave në kushtet aktuale.
Raporti i miratuar të mërkurën në Strasburg me 367 vota pro, 74 kundër dhe 188 abstenime, nënvizon thellimin e prapambetjes demokratike në vend, përfshirë arrestimin e kryebashkiakut të Stambollit, Ekrem İmamoğlu, shtypjen e protestave antiqeveritare dhe cenimin e lirive themelore.
“Procesi i pranimit është i ngrirë. Nuk ka përparim”, deklaroi raportuesi Nacho Sánchez Amor (S&D), duke e quajtur trajtimin ndaj İmamoğlu “kulmin e trendit represiv”.
Megjithatë, raporti thekson rëndësinë e ruajtjes së partneritetit strategjik me Ankaranë, sidomos në çështje si siguria energjetike, klima, tregtia dhe roli i Turqisë në konfliktet rajonale. Komisionerja për Zgjerimin, Marta Kos, përmendi efektivitetin e marrëveshjes BE-Turqi për migracionin, duke theksuar një ulje prej 33% të ardhjeve të parregullta nga Turqia këtë vit.
Një tjetër pikë kritike ishte vizita e fundit e Presidentit Erdogan në zonat e pushtuara të Qipros, veprim i dënuar nga eurodeputetët si sfidë ndaj të drejtës ndërkombëtare dhe integritetit territorial të një shteti anëtar të BE-së.
Për Sánchez Amor, dera e anëtarësimit të Turqisë nuk është mbyllur përgjithmonë, por nën udhëheqjen aktuale të AKP-së nuk ka vullnet politik për të përmbushur vlerat themelore të unionit.
Ai vuri në dukje ekzistencën e një shoqërie civile aktive në Turqi, e cila mban ende gjallë shpresën për një të ardhme evropiane të vendit.
Burimi: botasot.info
