Estonia është goditur nga sulme të shumta kibernetike pas heqjes së një monumenti tankesh të epokës sovjetike nga një rajon, popullsia e të cilit është kryesisht rusë etnikë, ka thënë qeveria e saj.
Grupi rus i hakerëve Killnet mori përgjegjësinë për sulmin, duke thënë se bllokoi aksesin në më shumë se 200 institucione shtetërore dhe private të Estonisë.
Qeveria estoneze këmbënguli se ndikimi i sulmit ishte i kufizuar dhe kaloi “kryesisht pa u vënë re”, shkruan The Guardian.
“Dje, Estonia iu nënshtrua sulmeve më të gjera kibernetike me të cilat është përballur që nga viti 2007”, tha sekretari i ministrisë së saj të çështjeve ekonomike.
“Me disa përjashtime të shkurtra dhe të vogla, faqet e internetit mbetën plotësisht të disponueshme gjatë gjithë ditës. Sulmi ka kaluar kryesisht pa u vënë re në Estoni.”
