Presidenti i Türkiye-s, Recep Tayyip Erdoğan, ka deklaruar se vendi i tij vazhdon bisedimet me Rusinë dhe Ukrainën për t’i dhënë fund luftës në vazhdim, raporton Anadolu Agency (AA).
“Ne dëshmuam, së bashku me marrëveshjen e drithërave dhe shkëmbimin e të burgosurve, se mund të hapet rruga drejt paqes nëse i jepet një mundësi diplomacisë”, tha Erdoğan në një samit trepalësh midis Türkiye-s, Azerbajxhanit dhe Turkmenistanit, duke përmendur marrëveshjet e ndërmjetësuara nga Türkiye midis dy palëve.
- Nënshkruhen 5 marrëveshje në samitin trepalësh Türkiye-Azerbajxhan-Turkmenistan
- Erdoğan takohet me presidentin e Turkmenistanit
“Ne vazhdojmë bisedimet tona me Putin-in dhe Zelenskyy-n në këtë drejtim. Shpresojmë se fillimisht do të arrijmë një armëpushim dhe më pas paqe të qëndrueshme në rajonin tonë”, shtoi Erdoğan.
Presidenti Erdoğan, presidenti i Azerbajxhanit, Ilham Aliyev dhe ai i Turkmenistanit, Serdar Berdimuhamedov, u takuan në qytetin perëndimor turkmen Avaza për të adresuar hapat për thellimin e mëtejshëm të bashkëpunimit midis tre vendeve në fusha të ndryshme, veçanërisht në tregti, energji dhe transport.
Presidenti turk gjithashtu tha se treshja duhet të fillojë punën për transportimin e gazit natyror turkmen në tregjet perëndimore.
“Ne jemi të gatshëm të punojmë për transferimin e energjisë elektrike nga Turkmenistani dhe Azerbajxhani në vendin tonë”, tha Erdoğan.
Erdoğan theksoi se anëtarësimi i plotë i Turkmenistanit në Organizatën e Shteteve Turke do të forconte grupin. Që nga viti 2021, Turkmenistani ka statusin e vëzhguesit në grup.
