Presidenti i Türkiye-s, Recep Tayyip Erdoğan, do të inaugurojë ndërtesën e terminalit dhe pistën e re të aeroportit Ercan në Republikën Turke të Qipros Veriore (TRNC), raporton Anadolu.
Ministri i Punëve Publike dhe Transportit i TRNC-së, Erhan Arıklı, tha se aeroporti i zgjeruar dhe i rinovuar do të jetë porta e TRNC-së drejt botës.
Arıklı njoftoi se kapaciteti vjetor i pasagjerëve të aeroportit Ercan, aktualisht në 4 milionë, mund të dyfishohet në 8 milionë dhe më pas edhe në 10 milionë, pasi terminali dhe pista e re do të jenë në dispozicion dhe çmimet e biletave të ulen.
Ai tha se aeroporti do të gjenerojë rreth 30 milionë euro të ardhura publike në vend.
Ceremonia e hapjes përkon me 49-vjetorin e Operacionin Turk të Paqes në ishullin e Mesdheut Lindor, i nisur më 20 korrik të vitit 1974 për t’i dhënë fund dhunës etnike nga qipriotët grekë kundër qipriotëve turq të ishullit.
Gjatë vizitës, presidenti Erdoğan do të takohet me presidentin e TRNC-së, Ersin Tatar, për të diskutuar marrëdhëniet dypalëshe dhe zhvillimet e fundit mbi çështjen e Qipros. Ata do të shkëmbejnë mendime mbi hapat që do të ndërmerren për të forcuar më tej marrëdhëniet Türkiye-TRNC.
Çështja e Qipros
Qiproja ka ngecur në një mosmarrëveshje prej dekadash midis qipriotëve grekë dhe qipriotëve turq, pavarësisht një sërë përpjekjesh diplomatike nga Kombet e Bashkuara (OKB) për të arritur një zgjidhje gjithëpërfshirëse.
Sulmet etnike që filluan në fillim të viteve 1960 i detyruan qipriotët turq të tërhiqen nga enklava për sigurinë e tyre.
Në vitin 1974, një grusht shteti i qipriotëve grekë që synonte aneksimin e ishullit nga Greqia çoi në ndërhyrjen ushtarake të Türkiye-s si një fuqi garantuese për të mbrojtur qipriotët turq nga persekutimi dhe dhuna dhe si rezultat në vitin 1983 u themelua TRNC-ja.
Vitet e fundit ka pasur një përpjekje për paqe, përfshirë një iniciativë të dështuar të vitit 2017 në Zvicër nën kujdesin e vendeve garantuese Türkiye-s, Greqisë dhe Mbretërisë së Bashkuar.
Administrata qipriote greke u anëtarësua në Bashkimin Evropian (BE) në vitin 2004, në të njëjtin vit kur qipriotë grekë penguan një plan të OKB-së për t’i dhënë fund mosmarrëveshjes së gjatë.
Türkiye mbështet plotësisht një zgjidhje me dy shtete në ishullin e Qipros bazuar në barazinë sovrane dhe status të barabartë ndërkombëtar.
