Ura e gurit, e cila është një nga simbolet kryesore historike të qytetit të Shkupit, është vazhdimisht cak i vandalizmit dhe sjelljes së pamatur, ndërsa te shtyllat në rrëzë të urës vazhdimisht shfaqen sasi të mëdha të mbeturinave të deponuara në mënyrë jo të duhur dhe ndihet një erë e pakëndshme. Kështu përmes një kumtese është shprehur, drejtori i Ndërmarrjes Publike “Higjiena Komunale-Shkup”, Zudi Enuzi.
“Çdo ditë e mirëmban higjienën dhe pastërtinë e Urës së Gurit si një nga hapësirat publike më të frekuentuara në qendër të qytetit. Ekipet e Ndërmarrjes kryejnë fshirjen dhe larjen manuale dhe makinerike të të gjithë sipërfaqes së urës, si dhe të sheshit Maqedonia dhe Filip i Dytë”, ka thënë Enuzi.
Sipas drejtorit të “NP Higjiena Komunale-Shkup”, Zudi Enuzi aktivitetet zhvillohen çdo ditë, me tre turne, duke përfshirë edhe fundjavat.
