Lajmërim i ri për bombë, këtë herë në gjimnazin “Nikolla Karev”. Siç tha për Meta.mk drejtori Andrej Manolev, sot pasdite në adresën zyrtare është dërguar email me përmbajtje “Në shkollën tuaj janë vendosur dy bomba”. Kjo është dita e tretë me radhë që në shkollat e Shkupit raportohet për një bombë, transmeton Portalb.mk.
“Dje dhe pardje është dërguar email në disa shkolla, por sot ka email vetëm në adresën tonë zyrtare të emailit. Ngadalë i evakuuam fëmijët jashtë në vend të sigurt, thirrëm MPB-në dhe më pas shërbimet policore nga Karposhi siguruan objektin që të mos hynte askush. Më pas erdhën njësitë e antiterrorizmit me qen të trajnuar posaçërisht dhe po hetojnë”, tha drejtori Manollev.
Ministria e Punëve të Brendshme njoftoi se në adresën e emailit të shkollës së mesme është marrë kërcënim për bombë.
“Menjëherë pas marrjes së kallëzimit, nga punonjësit e policisë merren masa për evakuimin e sigurt të shkollës dhe po merren kontrolle dhe masa antiterroriste për zbardhjen e rastit”, thuhet në njoftimin e MPB-së.
Kjo është dita e tretë që mesazhet për bomba të vendosura dërgohen me e-mail. Dy ditët e fundit, pas verifikimeve të bëra nga MPB, është konstatuar se kallëzimet kanë qenë të rreme.
Kërcënim për bombë ka pasur edhe dje pikërisht në orën 13:55, kur nëntë shkolla të mesme në Shkup morën email. Mesazhi i shkurtër thoshte se “sot në shkollë u vendosën shumë bomba”, dhe dërguesit thanë se ëndërronin të hakmerreshin, por nuk specifikuan se për çfarë hakmerreshin saktësisht.
Që nga marsi, kërcënimet e rreme për bomba në shkolla kanë tronditur disa vende në rajon. Gazeta serbe “Danas” në artikullin me titull “Si raportimet e rreme për bomba në Serbi morën statusin e një fatkeqësie elementare” shkruan se është një fenomen që e ndërlikon jetën.
Gazeta shkruan se ndërsa kjo lloj lufte hibride po arrin kulmin, disa institucione gjyqësore kanë njoftuar se kanë nisur hetimet për informacionin e rremë.
Burimi: portalb.mk
