Elon Musk do të tërhiqet nga blerja e OpenAI nëse krijuesi i ChatGPT heq dorë nga shndërrimi i organizatës jo-fitimprurëse në një kompani fitimprurëse thanë juristët e miliarderit ditën e Mërkure.
“Nëse bordi i OpenAI u qëndron misionit të saj fillestar, Musk do të tërhiqet nga përpjekjet për blerjen e saj,” thuhej në dosjen gjyqësore të padisë kundrejt OpenAI.
Në 2015-ën Sam Altman dhe Elon Musk bashkëthemeluan OpenAI si një organizatë bamirëse. Megjithatë Musk u largua prej saj për shkak të diferencave me Altman lidhur me drejtimin që duhej të merrte kompania.
Altman më pas u bë CEO dhe lançoi një njësi fitimprurëse brenda OpenAI për të siguruar financim nga investitorët si Microsoft. Altman tani po punon për ristrukturimin e bizneseve kyçe në një firmë fitimprurëse dhe nuk do të kontrollohet më nga bordi i organizatës.
Organizata do të bëhet aksionere brenda kompanisë së re ndërsa Musk ka paditur në gjykatë OpenAI për të parandaluar këtë gjë. Në fillim të javës Musk udhëhoqi një konsorcium për të blerë OpenAI, një përpjekje e fundit për të mos lejuar këtë ristrukturim.
/PCWorld Albanian
Burimi: pcworld.al
