Në emisionin “Pika e Takimit”, Amir Elezi, përfaqësues i lartë i VLEN-it, foli për zgjidhjen e çështjes së provimit të jurisprudencës për studentët shqiptarë në Maqedoninë e Veriut, si dhe për angazhimin e drejtpërdrejtë të tyre drejt zgjidhjes përfundimtare të këtij problemi disa vjeçar.
“Ajo që është për keqardhje është se, për disa vite me radhë, edhe pse kishte shumë ministra shqiptarë, nuk u bë e mundur që provimi i jurisprudencës të zhvillohej edhe në gjuhën shqipe. Meqë interpretimi i ligjit qenka i saktë dhe kaq mirë i strukturuar, atëherë shtrohet pyetja: përse nuk e realizuan këtë derisa ishin në pushtet? Sidoqoftë, kjo tani nuk ka më rëndësi. VLEN është në pushtet dhe tashmë ka formuar grupe pune që po merren me zgjidhjen e kësaj çështjeje. Në takime konsultative janë ftuar edhe studentët që protestuan dhe e aktualizuan çështjen e jurisprudencës në gjuhën shqipe. Gjithashtu, siç e kam theksuar, edhe përfaqësuesi ynë më i lartë në ekzekutiv, zëvendëskryeministri i parë Bekim Sali, është duke u marrë me këtë çështje. Unë jam optimist, duke pasur parasysh se nuk mungon angazhimi, nuk mungon përkushtimi, nuk mungon dija dhe debati brenda VLEN-it. Jam i bindur se kjo çështje do të marrë zgjidhje”, ka deklaruar Amir Elezi, përfaqësues i lartë i koalicionit VLEN.
Burimi: lajmpress.org
