Një foshnje e porsalindur ka ndërruar jetë në Klinikën e Gjinekologjisë në Qendrën Klinike Universitare të Kosovës, ndërsa akoma nuk dihen shkaqet e vdekjes.
Lajmin e ka konfirmuar drejtori i Gjinekologjisë, Zef Ndrejaj.
Ndrejaj tha se janë duke e hulumtuar rastin duke u bërë analiza laboratorike që të dihet se si ndërroi jetë foshnja.
”Kjo lindje ka ardhur në jetë gjatë vikendit. Ne jemi duke e hulumtuar rastin. Janë duke u bërë analiza laboratorike, historia, marrja e deklaratave. Placenta me frytin janë dërgu në autopsi të shohim tash”, ka thënë Ndrejaj
Në lidhje me shkaqet Ndrejaj ka thënë se munden të jenë të ndryshme, por po dyshohet për infeksion meqë nëna ka pas probleme edhe gjatë shtatzënisë.
“Shkaqet janë të shumta qe mundën me ardh te vdekja, mund të jetë ndonjë shkak i infeksionit se nëna ka pas probleme edhe gjatë shtatzënisë pacientja”, ka thënë Ndrejaj.
Rasti i foshnjës që ndërroi jetë tashmë po hetohet edhe nga Prokuroria.
Burimi: botasot.info
