Prokuroria Themelore Publike në Manastir ka lëshuar urdhër për zhvillimin e procedurës hetimore kundër 33-vjeçarit për të cilin ekziston dyshimi i arsyeshëm se ka kryer një vepër penale – vrasje gjatë kryerjes së dhunës në familje, përkatësisht e kualifikuar sipas nenit 123 paragrafi 2 pika 2 e Kodit Penal, transmeton Portalb.mk.
Dje në mëngjes, i dyshuari ia mori jetën ish-partneres së tij me të cilën kishte katër fëmijë të mitur. Pasi u sigurua se babai i saj nuk ishte në shtëpinë ku jetonte gruaja, i dyshuari hyri në shtëpi ndërsa ajo po flinte, iu afrua viktimës dhe e goditi me thikë dhjetë herë në trup, nga e cila ajo vdiq menjëherë.
“Prokurori publik i paraqiti propozim gjyqtarit të procedurës paraprake të Gjykatës Themelore në Manastir për të përcaktuar një masë paraburgimi për të dyshuarin, sepse ekziston rreziku që ai të arratiset”, thuhet në njoftim.
Ndaj kësaj vrasjeje, reagoi Rrjeti për Mbrojtje nga Diskriminimi, duke e cilësuar rastin si femicid dhe si një tjetër dëshmi të përkeqësimit të sigurisë për gratë në Maqedoninë e Veriut. Në reagimin e tyre, organizatat e shoqërisë civile theksojnë se ky nuk është një rast i izoluar, por pjesë e një trendi shqetësues të dhunës ndaj grave dhe dhunës në familje në vend.
Burimi: lajmpress.org
