E ardhmja e Paulo Dybalas vazhdon të jetë e paqartë, me argjentinasin që nuk ka vendosur akoma se cila do të jetë skuadra e re ku do të luajë sezonin e ri.
Interi është në “pole-position” për transferimin e ish-sulmuesit të Juventusit, por herë pas here në skenë dali edhe skuadra të tjera që kërkojnë shërbimet e argjentinasit.
Edhe një kalim te skuadra e Napolit është përfolur shpesh, por pavarësisht se vetë një ditë më parë numri një i klubit Aurelio De Laurentiis është shprehur se s’ka asnjë mundësi, ditën e sotme një tjetër deklaratë vjen për rastin e argjentinasit.
Këtë herë është djali i presidentit të Napolit, Edoardo De Laurentiis, i cili i pyetur nga tifozët ka lënë gjithçka të hapur për një transferim të ish-lojtarit të bardhezinjve në stadiumin “Maradona”.
“Kush e di, rrugët e Zotit janë të pafundme”, dëgjohet t’iu ketë thënë djali De Laurentiis tifozëve në një video të shpërndarë në rrjetet sociale.
