Të paktën 13 persona janë lënduar nga bombardimet në rajonin lindor të Donetskut, tha kreu i administratës ushtarake rajonale.
Pavlo Kyrylenko thotë se sulmi rus vazhdoi në pjesën qendrore të rajonit, me 11 civilë në Mariinsky, duke përfshirë katër fëmijë, të dërguar në spital. Dy persona të tjerë u plagosën në Ocheretyn, shtoi ai, raporton BBC, përcjell Bota sot.
Ai gjithashtu pretendoi se fosfori ishte përdorur në qytetet Maryinka, Krasnohorivka dhe Novomykhailivka. Këto pretendime nuk janë verifikuar në mënyrë të pavarur nga BBC.
Kyrylenko thotë se autoritetet po vazhdonin të dërgonin ujë të pijshëm dhe ushqim në vendbanimet në vijën e parë, por u bëri thirrje njerëzve të evakuohen, duke thënë: “Evakuimi është i përkohshëm. Gjëja më e rëndësishme tani është të shpëtojmë jetë”.
Presidenti ukrainas Volodymyr Zelensky akuzoi Rusinë për përdorimin e bombave me fosfor në një telefonatë me liderët e NATO-s javën e kaluar.
Fosfori i bardhë kimik shumë i ndezshëm nuk është i ndaluar në vetvete, pasi përdoret shpesh si perde tymi në fushën e betejës, por përdorimi i armëve të tilla ndezëse kundër objektivave civilë është i ndaluar nga Konventa e Gjenevës.
