Përfaqësuesi special i Mbretërisë së Bashkuar për Ballkanin Perëndimor, Ser Stuart Peach, ambasadori britanik në vend Matthew Lawson dhe ministrja e Mbrojtjes, Sllavjanka Petrovska, sot në poligonin “Krivollak” morën pjesë në pranim-dorëzimin e donacionit britanik, i cili përfshin 14 njësi mobile stërvitore, për trajnim të pjesëtarëve të Armatës në mjedisin urban, njofton Portalb.mk.
“Promovimi i donacionit britanik të 14 njësive mobile stërvitore, të cilat do të shërbejnë për trajnimin e pjesëtarëve të ushtrisë sonë të Maqedonisë, por sigurisht edhe të forcave aleate. Vlera totale e këtij projekti është 400 mijë funte, që është një kontribut i rëndësishëm në atë që do të thotë rinovimi dhe zhvillimi i poligonit ushtarak Krivolak”, tha ministrja Petrovska.
Ajo shtoi se në periudhën e kaluar të gjithë kemi pasur rastin ta shohim “Krivolakun” në edicione të ndryshme, pra gjatë realizimit të llojeve të ndryshme të aktiviteteve trajnuese, ndër të cilat më i madhi i mbajtur deri më tani “Swift Response”, që është një tjetër dëshmi dhe tregues se çdo investim në këtë poligon ia vlen.
“Është nder për mua që sot me ne është Sir Stuart Peach, si dhe ambasadori Loson, të cilët personalisht janë bindur dhe e kanë parë se ky donacion do të jetë me të vërtetë në dobi të madhe për zhvillimin e kapaciteteve tona”, theksoi Petrovska.
Ajo theksoi se Mbretëria e Bashkuar mbetet partneri ynë i rëndësishëm dhe aleati ynë kyç, ndërsa vendi dhe veçanërisht Ushtria mund të llogarisë gjithmonë në mbështetjen e tyre, jo vetëm si donacion, por edhe përmes ngritjes së kapaciteteve dhe zhvillimit të kapaciteteve njerëzore në radhët e ushtrisë.
“Së bashku jemi më të fortë, nuk është thjesht një gënjeshtër, është një tjetër dëshmi se përfitimet e NATO-s për Republikën e Maqedonisë së Veriut janë gjithnjë e më të dukshme”, tha Petrovska.
Ser Stuart Peach, nga ana e tij, tha se kjo është një tjetër dëshmi e bashkëpunimit dhe partneritetit bilateral që ekziston ndërmjet Maqedonisë së Veriut dhe Mbretërisë së Bashkuar.
“Sidomos në këto momente kur kemi një luftë në kontinent, kjo është një tjetër dëshmi se ne jemi këtu për të vepruar së bashku në aspektin e mbrojtjes, në aspektin e parandalimit dhe në aspektin e krijimit të aleancës sonë në kuadrin e parandalimit ndaj agresionit rus. Më lejoni të theksoj se NATO është një aleancë mbrojtëse e 30 vendeve sovrane dhe detyra jonë është në fakt të përfaqësojmë një aleancë mbrojtëse dhe një dëshmi tjetër është prania jonë këtu. Këtu do ta mbështes ministren në deklaratën e saj kur tha se së bashku jemi më të fortë, nuk është thjesht një trillim, por është thjesht mënyra se si funksionojmë dhe si do të mbrohemi nga ky agresion”, theksoi Peach.
Ndryshe, qëllimi i vizitës së Peach është të diskutojë për zhvillimin e mëtejshëm të marrëdhënieve ndërmjet dy vendeve, të ritheksojë përkushtimin e fortë të Mbretërisë së Bashkuar për integrimin euroatlantik të Maqedonisë së Veriut dhe të konfirmojë përkushtimin për forcimin e stabilitetit, demokracisë, sundimit të ligjit dhe përballjes me krimin dhe korrupsionin në vend dhe rajonin e Ballkanit Perëndimor.
Peach zhvilloi takim me presidentin Stevo Pendarovski.
Në takim u diskutua për marrëdhëniet e përgjithshme dypalëshe mes dy vendeve, situatën në rajon, si dhe ndikimin e pushtimit rus në Ukrainë në stabilitetin dhe sigurinë e kontinentit evropian.
Presidenti Pendarovski theksoi se Maqedonia e Veriut i kushton rëndësi të veçantë zhvillimit të marrëdhënieve bilaterale me Mbretërinë e Bashkuar dhe ka interes të vazhdueshëm për forcimin e bashkëpunimit ndërmjet dy vendeve në disa sfera me interes të përbashkët.
Në këtë kontekst, presidenti Pendarovski shprehu mirënjohjen e tij për donacionin e fundit britanik, i cili përfshin 14 njësi mobile për trajnimin e pjesëtarëve të Armatës në mjedis urban, të cilat do të dorëzohen sot në poligonin Krivolak, duke e vlerësuar si një tjetër konfirmim të aleancës së fortë të të dy vendeve – anëtare të aleancës së NATO-s.
Në takim u shkëmbyen mendime për fillimin e negociatave për anëtarësim të Maqedonisë së Veriut me Bashkimin Evropian
Peach – Xhaferi
Kryetari i Kuvendit të Republikës së Maqedonisë së Veriut, Talat Xhaferi, sot realizoi takim me Stuart Peach. Kryetari shprehu kënaqësi të veçantë për takimin e sotëm dhe e falënderoi mysafirin për agjendën e tij aktive në rajon dhe kontaktet e shpeshta me shtetin tonë, që janë shumë të çmuara dhe paraqesin nxitje për avancimin e marrëdhënieve të përgjithshme bilaterale ndërmjet Republikës së Maqedonisë së Veriut dhe Mbretërisë së Bashkuar.
Kryetari Xhaferi foli për bashkëpunimin dinamik dhe konstruktiv ndërmjet Republikës së Maqedonisë së Veriut dhe Mbretërisë së Bashkuar, dhe për partneritetin e fuqishëm bilateral që rezulton me mbështetje jashtëzakonisht të fuqishme të procesit tonë eurointegrues përmes financimit të projekteve në fusha të ndryshme. Veçanërisht vlerësohet bashkëpunimi shumëvjeçar edhe me Fondacionin e Demokracisë së Vestminsterit (WFD) dhe projektet që implementohen, a janë në funksion të zbatimit efektiv të funksioneve kryesore të Kuvendit. Bashkëpunimi bilateral ndërparlamentar mbindërtohet edhe përmes grupeve parlamentare të bashkëpunimit të të dy parlamenteve, si edhe nëpërmjet bashkëpunimit mes dy delegacioneve në AP të NATO-s dhe organizatave tjera ndërkombëtare.
Bashkëbiseduesit biseduan edhe për ngjarjet aktuale në rajonin e Ballkanit Perëndimor, për luftën në Ukrainë, impaktin e ndikimeve të treta mbi proceset e brishta demokratike në rajon, nevojën për kohezion politik ndërmjet të gjithë faktorëve shtetërorë dhe politikë, si në planin e brendshëm, ashtu edhe në atë të jashtëm. Ra fjala edhe për nevojën për vëmendjen e zmadhuar të BE-së në këtë rajon për të zvogëluar ndikimin e fuqive të treta që mund të kthejnë rrjedhën e integrimit të tij euroatlantik, a që nuk është në interes të shumicës së madhe të qytetarëve të këtyre vendeve. Ser Piç falënderoi sinqerisht për solidaritetin e madh dhe të dukshëm që Republika e Maqedonisë së Veriut e shfaqi dhe e konfirmoi ndaj popullit ukrainas, me çka vendi qartë tregoi se qëndron në anën e BE-së dhe aleatëve në NATO.
Ndanë vështrime edhe në raport me aktivitetet e ardhshme në procesin e skriningut dhe fazën e ardhshme të konferencës ndërqeveritare, për sfidat energjetike të rajonit dhe Evropës në përgjithësi, për pritjet e Procesit të Berlinit dhe Projektit Ballkani i Hapur, me ç’rast të dyja palët u zotuan për vazhdimin e mëtejshëm dhe implementimin e aktiviteteve të parashikuara.
Sot për vizitë në Maqedoni do të qëndrojë edhe Kryetarja e Komisionit Evropian, Ursula von der Leyen duke nisur kështu zyrtarisht turneun e saj nëpër vendet e Ballkanit Perëndimor, i cili do t’i kushtohet krizës energjetike.
Një pjesë e ndihmës në fushën e krizës energjetike, siç paralajmëroi Von der Leyen javën e kaluar nga Strasburgu, do të jetë përfshirja e vendeve të Ballkanit Perëndimor për blerjen e përbashkët të energjisë me vendet e BE-së.
Burimi: portalb.mk
