Inspektorët e ekipeve mobile të Drejtorisë doganore konfiskuan 26 mijë tableta ekstazi me peshë totale rreth 12 kilogramë, 84 gramë kokainë dhe 31 gramë marihuanë, në vlerë të llogaritur prej 200 mijë euro, të cilat do të shpërndaheshin në vend.
Janë bërë kontrolle shtesë në disa lokacione dhe kundër tre personave është dorëzuar kallëzim penal në Prokurorinë Themelore Publike.
Gjegjësisht, lënda narkotike është gjetur më 25.11.2022 në orët e hershme të mëngjesit në hyrje të vendkalimit kufitar Tabanoc, pasi është kryer kontroll doganor me skaner mobil në veturën e pasagjerëve me targa të huaja e drejtuar nga shtetas i Maqedonisë.
Të njëjtën ditë, pas urdhrave të lëshuara për bastisje të shtëpisë dhe objekteve tjera nga inspektorët e Departamentit për kontroll dhe hetim të Drejtorisë doganore, në bashkëpunim me zyrtarë policorë, janë kryer kontrolle në disa adresa në Shkup dhe Tetovë. Në këtë mënyrë u gjetën prova shtesë dhe u arrestuan dy persona të tjerë.
Drejtoria doganore – Departamenti për kontroll dhe hetime sot ka dorëzuar kallëzim penal në Prokurorinë Themelore Publike për Prokurorinë e Krimit të Organizuar dhe Korrupsionit kundër 3 personave për veprën penale “Prodhim i paautorizuar dhe vendosje në treg i narkotikëve, substancave psikotrope dhe prekursorë” dhe për ta propozohet masë paraburgimi për 30 ditë.
Burimi:________
