Dogana bën thirrje për raportimin e rasteve të dyshuara të korrupsionit

Dogana e Kosovës u ka bërë thirrje qytetarëve që të raportojnë rastet e dyshuara të korrupsionit përmes kanaleve zyrtare.

Sipas Doganës, raportimi i rasteve të dyshuara të korrupsionit kontribuon në forcimin e transparencës, llogaridhënies dhe integritetit institucional, ndërsa korrupsioni dëmton qytetarët dhe interesin publik.

“Nëse hasni ose keni informacion për një rast të dyshuar korrupsioni, përdorni kanalet zyrtare të raportimit dhe përcillni informacionin në mënyrë të saktë dhe të përgjegjshme”, thuhet në njoftim.

Dogana ka bërë të ditur se rastet e dyshuara të korrupsionit mund të raportohen edhe përmes numrit pa pagesë 0800 50 095.

“Mos heshtni përballë korrupsionit”, thuhet në njoftim.

Dogana ka bërë thirrje që rastet të raportohen përmes institucioneve dhe mekanizmave zyrtarë.

“Informohu. Raporto. Kontribuo për transparencë dhe integritet. Vepro me përgjegjësi”, thuhet në njoftimin e Doganës së Kosovës.