Një dizajnere nga New York ka paditur kompaninë e Kim Kardashian, Skims, duke e akuzuar për përdorim të një emri tregtar që sipas saj i përket biznesit të saj të vogël.
Sipas padisë së dorëzuar në Gjykatën Federale në New York, kompania “Fits Everybody To A T”, në pronësi të Denise Cesare, pretendon se Skims ka përdorur emrin “Fits Everybody” për një nga koleksionet e saj më të njohura pa leje.
Cesare thotë se ajo e ka përdorur këtë emër prej vitesh, para se marka Skims të krijohej.
Në dokumentet gjyqësore thuhet se Skims ka vijuar me përdorimin e këtij emri edhe pas paralajmërimeve për shkelje të mundshme të markës tregtare. Linja e produkteve është kthyer ndërkohë në një nga më fitimprurëset e kompanisë.
Nga ana tjetër, autoritetet amerikane kanë refuzuar më herët përpjekjet për regjistrimin e markës “Fits Everybody”, për shkak të ngjashmërisë dhe rrezikut të konfuzionit në treg.
Dizajnerja kërkon dëmshpërblim financiar, ndalimin e përdorimit të emrit dhe kthimin e fitimeve të realizuara nga ky koleksion. Çështja pritet të shqyrtohet në gjykatë dhe mund të ketë ndikim të madh për Skims nëse vendoset në favor të saj.
Burimi: botasot.info
