Atletiko Madrid pret nesër në mbrëmje Interin në ndeshjen e vlefshme për raundin e 5-të në Ligën e Kampioneve. Në prag të kësaj sfide, trajneri Diego Simeone foli në konferencën e zakonshme për shtyp.
“Ata janë një ekip që luan shumë mirë, kanë personalitet dhe një sistem sulmi shumë të qartë. Skuadra e tyre është e pabesueshme.
E pashë ndeshjen kundër Milanit, ata dominuan gjatë gjithë kohës dhe patën raste që mund të kishin fituar. Shifrat e tyre në Ligën e Kampioneve flasin vetë.”
Sa e rëndësishme do të jetë kjo ndeshje?
“Të gjitha ndeshjet janë të rëndësishme, pavarësisht kundërshtarit. Jemi në ngritje, do të duhet të përmirësohemi në disa fusha dhe e dimë këtë. Po punojmë për këtë”.
Çfarë avantazhi do t’ju japë të luani në shtëpi?
“Si gjithmonë, do të kemi nevojë për tifozët tanë, ata janë çelësi i suksesit në shtëpi. Ata e dinë se janë një forcë lëvizëse dhe mezi presim t’i kemi me vete”.
Dy vjet pas herës së fundit, sfida përsëritet…
“Disa lojtarë janë ende këtu, por kanë ndryshuar trajnerë dhe taktika. Më pëlqen shumë skuadra e Interit, është e mrekullueshme. Dhe të gjithë ata që erdhën nga stoli kundër Milanit e vërtetuan vlerën e tyre.”
A mendon ndonjëherë të drejtosh Interin?
“Po, në karrierën time si trajner, e imagjinoj veten një ditë në stolin e Interit”.
Burimi: botasot.info
