Didier Deschamps e ka përjashtuar Karim Benzeman nga një rikthim i mundshëm në Kombëtaren e Francës për finalen e nesërme të Kupës së Botës.
Aventura e fituesit të Topit të Artë në Kupën e Botës përfundoi ende pa nisur, pasi ai pësoi një lëndim në kofshë gjatë stërvitjes.
Rikthimi në stërvitje i Benzemas për Real Madridin përhapi spekulime se sulmuesi francez mund të bëjë një rikthim te Franca për finalen e Botërorit kundër Argjentinës.
Por duke folur në një konferencë për media në Doha para finales, trajneri i Francës, Didier Deschamps e konfirmoi rolin e Benzemas nesër kundër Argjentinës.
“Disa lojtarë kanë qenë të lënduar dhe Karim Benzema ishte njëri prej tyre dhe Lucas Hernandez u lëndua në ndeshjen e parë. Nuk e kam në dorë unë që të vendos se kush vjen për ta shikuar ndeshjen, ish-lojtarë apo lojtarë të lënduar, unë fokusohem në skuadrën time dhe lojtarët që i kam në dispozicion”, tha Deschamps.
“Ne kemi humbur tre, Christopher Nkunku, Karim Benzema dhe Lucas Hernandez dhe unë i humba ata edhe pse ata ishin pjesë e skuadrës fillestare. Kështu që tani unë jam duke u fokusuar në skuadrën time prej 24 lojtarësh dhe ata janë të cilët unë do t’i kem në dispozicion nesër”, shtoi më tej trajneri i Francës.
Spekulimet për një rikthim të Benzemas te Franca filluan të qarkullojnë pasi që ai është ende një lojtar i regjistruar i skuadrës dhe do të ishte një kampion bote nëse Franca e mbron titullin e vitit 2018.
