1
Shkup, 14 tetor – Deputetja Ollga Llozanovska, në cilësinë e kryetares së Grupit Parlamentar për bashkëpunim të Kuvendit të Republikës së Maqedonisë së Veriut për bashkëpunim me Parlamentin e Republikës Popullore të Kinës, si pjesë e delegacionit të zyrtarëve të lartë nga Lindja dhe Evropa Qendrore, merr pjesë në shkëmbimin e rregullt vjetor në kuadër të bashkëpunimit midis Kinës dhe vendeve të Evropës Lindore dhe Qendrore, me ftesë personale të Sekretariatit të nismës.
Siç bëri të ditur pres shërbimi kuvendor, anëtarët e delegacionit, të cilët vijnë nga 10 shtete të Evropës Lindore dhe Qendrore, patën takim me Zëvendësministrin e Punëve të Jashtme të Republikës Popullore të Kinës, i cili është Sekretar i Përgjithshëm i Bashkëpunimit Kinë-CEI, Dong Li.
Në takim u theksua se kjo iniciativë për bashkëpunim ndërmjet vendeve të Evropës Lindore dhe Qendrore dhe Kinës nënkupton bashkëpunim ndërmjet partnerëve të barabartë dhe se edhe pse bëhet fjalë për vende të ndryshme me potencial të ndryshëm, synimi është të gjendet interes i përbashkët.
Krahas bashkëpunimit me Republikën Popullore të Kinës, Nisma u mundëson vendeve pjesëmarrëse të forcojnë bashkëpunimin ekonomik mes tyre, si dhe të paraqiten si rajon përballë kompanive të mëdha kineze. Duke qenë se numri më i madh i vendeve pjesëmarrëse në këtë bashkëpunim janë anëtare të Bashkimit Evropian, u theksua se kjo nënkupton edhe forcimin e bashkëpunimit ndërmjet Unionit dhe Kinës, qëndron në kumtesë.
Në takim, Llozanovska theksoi se edhe pse janë të largëta gjeografikisht, marrëdhëniet mes dy vendeve janë miqësore dhe zhvillohen në frymën e mirëkuptimit dhe respektit të ndërsjellë. Ajo theksoi se ka mundësi për forma më të larta të bashkëpunimit ekonomik si në kuadër të iniciativës ashtu edhe në nivel dypalësh, duke pasur parasysh se ekonomia kineze është e dyta më e madhe në botë dhe ka një rritje ekonomike vjetore mbresëlënëse.
Programi i vizitës së punës parashikon takime zyrtare me përfaqësues të rangut të lartë të pushtetit qendror dhe vendor në Pekin, si dhe në provincat Shandong dhe Shanshi. Në Shandong, gjegjësisht në qytetin Jantai, Delegacioni do të marrë pjesë në takimin e 6-të të liderëve lokalë të Kinës – Evropës Lindore dhe Qendrore.
Në prill 2012, bashkëpunimi midis Kinës dhe vendeve të Evropës Qendrore dhe Lindore u lançua si një platformë për bashkëpunim ndërrajonal bazuar në miqësinë tradicionale dhe dëshirën e përbashkët të të gjithë pjesëmarrësve për bashkëpunim dhe zhvillim të përbashkët. Kjo iniciativë e Ministrisë së Punëve të Jashtme kineze synon kryesisht promovimin e marrëdhënieve të biznesit dhe investimeve midis Kinës dhe 14 vendeve nga Evropa Qendrore dhe Lindore, por përveç ekonomisë dhe tregtisë, sot bashkëpunimi mbulon edhe fusha të tilla si kultura, arsimi, shkëmbimi i të rinjve, bujqësi, turizëm.
BURIMI: zhurnal.mk
