Tre banesa dhe qindra hektarë tokë u dogjën gjatë zjarrit të ditëve të fundit në Fier. Banorët thonë se askush nga institucionet nuk i ka kontaktuar për dëmshpërblim dhe llogaritje të dëmeve.
Zjarret që përfshinë Fierin tre ditë më parë, masivin pyjor të Peshtanit dhe që me pas u përhap drejt fshatit Kraps, kanë lënë dëme të konsiderueshme tek banorët. Tre banesa u shkrumbuan nga flakët, e dhjetëra të tjerë, pësuan dëme të mëdha materiale.
Banorët thonë se ndihma e ofruar nuk ka qenë e mjaftueshme, për të shuar flakët. Ju është dashur të përdorin mjete rrethanore për të shpëtuar ato banesa që mbetën.
Ata tregojnë tmerrin e përjetuar gjate asaj dite të nxehte korriku, kur flakët të favorizuara edhe nga era rrezikuan jo vetëm banesat por dhe jetët e tyre.
“Nuk mbajmë mend një zjarr të përmasave të tilla”- thonë banorët, teksa theksojnë se përjetimi i asaj dite u është kthyer në makth.
“Kemi parë nëpër filma zjarr pranë banesave, por nuk ka eksperiencë më të vështirë se sa ta përjetosh vetë. Sheh që jeta të rrezikohet”- shprehen banorët
Banorët bëjnë thirrje për ndihmë nga shteti, pasi ullishtet dhe vreshtat që u bënë hi nga zjarri, ishin burimi i vetëm i të ardhurave të tyre.
Ndërkohë bilanci paraprak i dëmeve të zjarrit arrin në 220 hektarë sipërfaqe të përshkruar nga flakët dhe rreth 65 ha e shkrumbuar totalisht me pisha, dushk dhe ullishte.
