Deklarata e trajnerit të Liverpoolit gjeneron polemika

Trajneri i Liverpoolit, Arne Slot, ka bërë deklarata të forta lidhur me filozofinë e tij të futbollit, duke theksuar se, afatgjatë, praktikimi i një futbolli tërheqës dhe argëtues për tifozët është më i vlefshëm se fitimi i trofeve.

Fjalët e tij vijnë në një moment të vështirë për klubin, i cili renditet i gjashti në Premier League, 14 pikë prapa liderit Arsenal, dhe me të ardhmen e trajnerit të vendosur nën dyshim.

Pas një sezoni debutues të suksesshëm, ku Liverpool fitoi titullin e Premier League, Slot nuk ka arritur të përsërisë performancën e lartë këtë sezon.

Megjithë investimin prej 480 milionë eurosh në merkato për të forcuar skuadrën kampione, shanset për të fituar trofe mbeten të kufizuara në FA Cup dhe Champions League.

Në një intervistë për ‘podcast’-in ‘The Reds’ Roundtable, Slot shpjegoi filozofinë e tij:

“Si trajner mund të fitosh Premier League, Champions League, FA Cup ose Ligën e Kupës, por fitorja më e madhe është të praktikosh futbollin më të këndshëm për t’u parë.

Dua gjithmonë të kem topin, dua lojë intensive dhe që tifozët të shijojnë atë që shohin.” Megjithatë, ai pranon se jo të gjithë tifozët janë të kënaqur me rezultatin aktual, duke shtuar se, në plan afatgjatë, stili i lojës ka më shumë rëndësi se trofetë.

Deklaratat e tij janë kritikuar ashpër nga ish-lojtarë dhe komentatorë. Jamie O’Hara tha për Sky Sports News: “Nëse Liverpool nuk kualifikohet për Champions League, Arne Slot duhet të largohet. Nuk mund të fitosh trofe duke luajtur futboll të dobët.”

Edhe Jamie Carragher e kritikoi trajnerin duke vënë në dukje se investimi i madh dhe statusi i kampionit e bëjnë situatën të paqëndrueshme:

“Ekipi nuk është përshtatur ndaj Premier League-s, veçanërisht ndaj topave të ndaluar, kundërsulmeve dhe lojës kundër blloqeve të ulëta. Mund të përfundojnë jashtë zonave të Champions League.”

Në sfond, deklarata e Slot ka ndezur polemika mbi prioritetin midis stilit të lojës dhe fitimit të trofeve, ndërsa Liverpooli përballet me një krizë performancash që rrezikon reputacionin e kampionit në fuqi.